ဘုရား ဘုရား... နင့်ကို အိပ်မက်မက်တယ် သူငယ်ချင်းရေ။ အိပ်မက်ထဲမှာ ငါတို့နှစ်ယောက် လွန်ခဲ့တဲ့ အနှစ်နှစ်ဆယ် လောက်ကို ပြန်ရောက်သွားတယ်။ နင်မှတ်မိဦးမလား ဟင်။ ပြည်က နင်တို့ နေခဲ့တဲ့ နှစ်ထပ်အိမ်ကြီးလေ...။ နောက်ဆုံးနေခဲ့တဲ့ ခြံဝင်းလေးနဲ့ တစ်ထပ်အိမ်လေး မဟုတ်ဘူးလေ။ အဲ့ဒီအိမ်မတိုင်ခင်က နှစ်ထပ်အိမ်ကြီး။ အပေါ်ထပ်မှာ နင်နဲ့ငါနဲ့ အတူတူ လေဒီရှူးပုံ အဆွဲပြိုင်ကြဖူးသေးတယ်လေ။ အင်း... အခု အိပ်မက်ထဲမှာ အဲ့ဒီ အပေါ်ထပ်အခန်းမှာ မှန်အကြီးကြီးတစ်ချပ် ရှိတယ်တဲ့။ တကယ်ရှိမရှိ ငါမမှတ်မိတော့ပါဘူး ဟယ်။ အဲ့ဒီမှန်ကြီးရှေ့မှာ ငါတို့နှစ်ယောက်လုံး ဂါဝန်လေးတွေ အ၀ိုင်းလှည့်နေကြတာ။ ထုံးစံအတိုင်း ဘယ်သူ့ဂါဝန်က ပိုကားလဲ ပြိုင်နေကြတာပေါ့...။ ရယ်ရတယ်သိလား အိပ်မက်ထဲမှာ နင်ရောငါရော ပေစုတ်စုတ်လေးတွေပဲ။ အခုလို မျက်နှာပေါ်မှာ အထပ်ထပ်ဖို့ထားတဲ့ ဈေးကြီးကြီး အလှပြင်ပစ္စည်းတွေ မပါဘူးဟာ...။ ငါတို့အဲ့ဒီတုန်းက တော်တော် အပြစ်ကင်းကြသေးတယ်နော်။
အိပ်မက်ကလန့်နိုးလာတော့ ငါတော်တော်လေး နင့်ကို သတိရသွားတယ်။ ဖုန်းဆက်မလို့ စဉ်းစားပေမယ့် မဆက်ဖြစ်ပါဘူး။ နင်က အိပ်မက်ထဲက နင် မဟုတ်သလို ငါကလည်း အိပ်မက်ထဲက အရွယ် မဟုတ်တော့ဘူးလေ။ ဒါပေမယ့် ငါ့ရဲ့ မသိစိတ်မှာ နင့်ကို သတိရနေမိပါလားလို့ ငါတွေးမိတယ်။
...
ဂျပန်ကို နင်နဲ့ အတူတူသွားလည်ရရင် ဘယ်လိုများနေမှာပါလိမ့်လို့ တွေးမိဖူးတယ်။ အဲ့ဒီတုန်းက ငါက ၇တန်း နင်က ၆ တန်းပေါ့။ ငါ့ထက်အမြဲပဲ ကြီးချင်နေတဲ့ နင်ဟာ အသက်အားဖြင့် ၃ လလောက်က ငယ်သေးတယ်။ ငါက ကျောင်းကို တစ်နှစ်စောနေလိုက်တော့ နင့်ထက် တစ်နှစ်ကြီးသလို ဖြစ်သွားပြန်ရော။ နင်အစ်မလို့ ခေါ်ရတဲ့သူတွေက ငါ့သူငယ်ချင်းတွေလေ။ အေး... ထားလိုက်ပါ။ ဒီဂျပန်ကိစ္စက နင်ငါ့ကို အိပ်မက်ပေးတာလေ။ နိုင်ငံခြားဆိုတာ ပျော်စရာဘုံဗိမာန်လို့ ထင်နေခဲ့ဖူးတဲ့ ငါကတော့ နင်နဲ့နှစ်ယောက်တည်း ဂျပန်ကို သွားရမယ်ဆိုတုန်းက အရမ်းပျော်ခဲ့တာပေါ့။ လေယာဉ်ပေါ်မှာ ဘယ်လိုနေလိုက်မယ်... ဘာတွေစားလိုက်မယ်... ဘာတွေဝတ်လိုက်မယ်နဲ့... တွေးလို့ကို မပြီးနိုင်ဘူး။ နောက်တော့လည်း နင့်မိဘတွေသာ ပြန်ရောက်လာရော... နင်နဲ့ငါလည်း ဂျပန်မပြောနဲ့ .. ချောင်းသာတောင် အတူတူမသွားဖြစ်လိုက်ပါဘူး။ ဇလွန်တော့ တစ်ခေါက်ရောက်သေးတယ်နော်။
ဇလွန်သွားတုန်းက ငါက ရည်းစားရပြီးခါစ... ကားပေါ်မှာ အဖြူရောင်သူငယ်ချင်း အခွေကို ထပ်တလဲလဲ ဖွင့်နေကြတာလေ။ နင်နဲ့ငါနဲ့ အခြောက်စကားတွေ တလမ်းလုံးမိုးမွှန်အောင် ပြောခဲ့ကြတာ။ ဇလွန်ပြည်တော်ပြန် ဘုရားကြီးရဲ့ မုခ်လေးမုခ်ကနေ ငါးပါးသီလတွေဆိုပြီး ဘုရား ရှိခိုးကြတာ... အခုထိ အမှတ်တရရှိနေတုန်းပါပဲ ဟယ်။ ခရီးကပြန်တော့ ငါလည်း အခြောက်စကား တော်တော် ကျော်ရကွမ်း သွားတယ် ဟ။
....
ဆက်ပါဦးမည်။
No comments:
Post a Comment